ຄະນະຜູ່ແທນຂັ້ນສູງ ອົງການໄອຍະການປະຊາຊົນສູງສຸດ ສໍາເລັດການຢ້ຽມຢາມ ຣາຊະອານາຈັກກໍາປູເຈຍ

ໂດຍຕອບສະໜອງຕາມຄໍາເຊີນຂອງ ທ່ານ ນາງ ເຈຍ ລຽງ ຫົວໜ້າ ອົງການໄອຍະການສູງສຸດ ແຫ່ງ ຣາຊະອານາຈັກກໍາປູເຈຍ. ຄະນະຜູ່ແທ່ນຂັ້ນສູງ ແຫ່ງ ສປປ ລາວ ນໍາໂດຍ ທ່ານ ຄໍາສານ ສຸວົງ ຫົວໜ້າ ອົງການໄອຍະການປະຊາຊົນສູງສຸດ ໄດ້ເດີນທາງໄປຢ້ຽມຢາມ ແລະ ເຮັດວຽກຢ່າງເປັນທາງການຢູ່ຣາຊະອານາຈັກ ກໍາປູເຈຍ ເປັນເວລາ 04 ວັນ, ນັບແຕ່ວັນທີ 19-22 ມີຖຸນາ 2014 ດ້ວຍຜົນສໍາເລັດອັນຈົບງາມ.

ໄລຍະຢູ່ຢ້ຽມຢາມ ຄະນະຜູ່ແທນຂອງລາວກໍ່ໄດ້ເຂົ້າຢ້ຽມພົບປະ ແລະ ຮ່ວມລົງນາມບົດບັນທຶກຄວາມເຂົ້າໃຈ ກັບອົງການໄອຍະການ ສູງສຸດ ແຫ່ງ ຣາຊະອານາຈັກ ກໍາປູເຈຍ. ຊຶ່ງຝ່າຍລາວນໍາໂດຍ ທ່ານ ຄໍາສານ ສຸວົງ ຫົວໜ້າ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ແລະ ຝ່າຍກໍາປູເຈຍນໍາໂດຍ ທ່ານ ນາງ ເຈຍ ລຽງ ຫົວໜ້າ ອົງການໄອຍະການສູງສຸດ ແຫ່ງຣາຊະອານາ ຈັກກໍາປູເຈຍ. ຊຶ່ງ ເນື້ອໃນລົງນາມສອງຝ່າຍໄດ້ແລກປ່ຽນການຢ້ຽມຢາມສອງປີຕໍ່ຄັ້ງ ໃນລະດັບສູງ ແລະ ລະດັບຜູ່ຊ່ຽວຊານ ໂດຍຜັດປ່ຽນກັນເປັນເຈົ້າພາບ; ສົ່ງ ຄະນະຜູ່ແທນ ຫຼື ຄະນະວິຊາການຂອງແຕ່ລະຝ່າຍຕາມການເຊື້ອເຊີນ ເພື່ອເຂົ້າຮ່ວມການຄົ້ນຄ້ວາ, ການຝຶກອົບຮົມ, ການສໍາມະນາ ຫຼື ກິດ ຈະກໍາອື່ນໆ; ອໍານວຍຄວາມສະດວກໃຫ້ອົງການໄອຍະການທ້ອງຖິ່ນ, ແຂວງທີ່ມີຊາຍແດນຕິດຈອດກັນເພື່ອສ້າງ ແລະ ເພີ່ມທະວີສາຍພົວ ພັນ ແລະ ແຈ້ງ ໃຫ້ກັນຊາບຢ່າງເປັນທາງການ ກ່ຽວກັບການລະເມີດກົດໝາຍ ແລະ ບັນຫາອາຊະຍາກໍາໃນພື້ນທີ່ຂອງຕົນ; ແລກປ່ຽນເອກະສານກົດໝາຍ - ຂໍ້ມູນທີ່ພົວພັນເຖິງວຽກງານໄອຍະການ, ປະສົບການ ແລະ ບົດຮຽນທີ່ດີໃນວຽກງານໄອຍະການ, ການປະຕິຮູບວຽກງານຍຸ ຕິທໍາທີ່ມີຜົນປະໂຫຍດຮ່ວມກັນ ກໍ່ຄືບົດວາລະສານກົດໝາຍຕາມການຮ້ອງຂໍຂອງອີກຝ່າຍໜຶ່ງ; ຮ່ວມມື ໃນການຝຶກອົບຮົມກ່ຽວກັບທັກສະ ການສັ່ງຟ້ອງ ແລະ ປັບ ປຸງເຕັກນິກວິຊາການໃຫ້ແກ່ພະນັກງານໄອຍະການໃນກໍານົດເວລາອັນເໝາະສົມ ແລະ ຄວາມອາດສາມາດຂອງສອງ ຝ່າຍຈະຂະຫຍາຍການຮ່ວມມືພາຍໃນຂອບກິດຈະກໍາທີ່ສອງຝ່າຍເຫັນດີນໍາກັນ.

ສປປ ລາວ ແລະ ຣາຊະອານາຈັກ ກໍາປູເຈຍ ແມ່ນສອງປະເທດທີ່ມີຊາຍແດນຕິດຈອດກັນ, ເປັນປະເທດບ້ານໄກ້ເຮືອນຄຽງ, ປະຊາຊົນ ສອງ ປະເທດເຄີຍມີມູນເຊື້ອໃນການໄປມາຫາສູ່, ມີຄວາມຮັກແພງ, ເຊື່ອໜັ້ນເຊີ່ງກັນ ແລະ ກັນດ້ວຍວັດທະນະທໍາ ແລະ ຮີດຄອງ ປະເພນີ ຄ້າຍຄືກັນ ຊຶ່ງແມ່ນໍ້າຂອງເປັນສັນຍາລັກແຫ່ງມິດຕະພາບ ແລະ ສັນຕິພາບຢ່າງສະຫງົບສຸກມາແຕ່ດົນນານ. ມາໃນໄລຍະປົກປັກຮັກ ສາ ແລະ ພັດທະນາສ້າງສາປະເທດຊາດນີ້, ສອງປະເທດໄດ້ສືບຕໍ່ເສີມຂະຫຍາຍສາຍພົວພັນຮ່ວມມື ທີ່ມີມາແຕ່ດົນນານນັ້ນໃຫ້ນັບມື້ຮັດ ແໜ້ນຢ່າງບໍ່ຢຸດຢັ້ງ. ດັ່ງນັ້ນ ການເສີມຂະຫຍາຍມູນເຊື້ອການພົວພັນຮ່ວມມືຂອງສອງປະເທດ ລາວ - ກໍາປູເຈຍ ແລະ ກໍາປູເຈຍ - ລາວ ເວົ້າລວມສອງອົງການໄອຍະການ ໃນໄລຍະໃໝ່ຈຶ່ງເປັນຄວາມຮຽກຮ້ອງຕ້ອງການກໍ່ຄືຄວາມມຸ້ງຫວັງຂອງ ອົງການໄອຍະການສອງປະ ເທດ.ຂະນະດຽວກັນຄະນະຜູ່ແທນຂັ້ນສູງ ອົງການໄອຍະການປະຊາຊົນສູງສຸດ ແຫ່ງ ສປປ ລາວ ກໍ່ໄດ້ເຂົ້າຢ້ຽມຂໍ່ານັບ ພະນະ ທ່ານ ສົມເດັດ ເຕໂຊ ຮຸນແຊນ ນາຍົກລັດຖະມົນຕີ ແຫ່ງຣາຊະອານາຈັກ ກໍາປູເຈຍ, ຢ້ຽມຢາມອົງການໄອຍະການນະຄອນຫຼວງພະນົມເປັນ, ຢ້ຽມຢາມໄອຍະການຂັ້ນອຸທອນ ແລະ ເຂົ້າຢ້ຽມຢາມລັດຖະມົນຕີ ວ່າການກະຊວງ ຍຸຕິທໍາ. ຢ້ຽມຊົມພະຣາຊະວັງເຈົ້າຊີວິດ ແລະ ຫໍພິພິຕະ ພັນແຫ່ງຊາດຕາມລໍາດັບ.

    

ຈາກນັ້ນ ຄະນະຜູ່ແທນດັ່ງກ່າວກໍ່ໄດ້ເດີນທາງໄປຢ້ຽມຢາມນະຄອນສຽມລຽບ ໂດຍມີ ທ່ານ ຮອງຫົວໜ້າ ອົງການໄອຍະການສູງສຸດແຫ່ງ ຣາຊະອານາຈັກ ກໍາປູເຈຍ ເປັນຜູ່ພາທາງ ຊື່ງມີ ທ່ານ ເກີດ ວັນນະເລີດ ຫົວໜ້າອົງການໄອຍະການນະຄອນສຽມລຽບ ແລະ ພະນັກງານຂັ້ນສູງໃຫ້ການຕ້ອນຮັບດ້ວຍຄວາມອົບອຸ່ນ ແລະ ສະໜິດສະໜົມທີ່ເຕັມໄປດ້ວຍໄມຕິຈິດມິດຕະພາບ ແລະ ການພົວພັນຮ່ວມມືທີ່ດີ ຢ່າງສະເໝີຕົ້ນສະເໝີປາຍ. ຈາກນັ້ນຄະນະຜູ່ແທນກໍ່ໄດ້ໄປຢ້ຽມຊົມອັງກໍວັດ ທີ່ເປັນປູສະນິສະຖານອັນລືຊື່ ແລະ ມໍລະດົກໂລກ ແລະ ວັດ ອື່ນໆທີ່ສໍາຄັນຈໍານວນໜື່ງ.

2014-07-04

ປະຕິທິນ

Apr-2018
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ