ອົງການໄອຍະການປະຊາຊົນສູງສຸດ ລາວ-ໄທ ສືບຕໍ່ເພີ່ມທະວີການຈັດຕັ້ງປະຕິບັດບົດບັນທຶກຄວາມເຂົ້າໃຈນຳກັນ (MOU)

         ​ປະຕິບັດ​ຕາມການ​ເຊື້ອ​ເຊີນ​ຂອງ​ທ່ານ ຕະກຸນ ວິນິດ​ໄນພາກ ​ໄອ​ຍະ​ການ​ສູງ​ສຸດ ​ແຫ່ງ ຣາຊະ​ອານາຈັກ​ໄທ, ທ່ານ ​ໄຊຊະນະ ​ໂຄດ​ພູທອນ ຮອງ​ຫົວໜ້າ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ແຫ່ງ ສປປ ລາວ ພ້ອມ​ດ້ວຍ​ຄະນະ​ໄດ້​ເດີນທາງ​ໄປ​ຢ້ຽມຢາມ ​ແລະ ​ເຮັດ​ວຽກຮ່ວມ​ກັບ​ໄອ​ຍະ​ການ ​ແຫ່ງ ຣາຊະ​ອານາຈັກ​ໄທ ​ໃນ​ລະຫວ່າງ​ ວັນ​ທີ 22-23 ມີນາ 2015.

ການ​ພົບ​ປະ​ສອງ​ຝ່າຍ​ໄດ້​ມີ​ຂຶ້ນ​ຕອນ​ເຊົ້າ ວັນ​ທີ 23 ມີນາ ທີ່ ​ຫ້ອງ​ຮັບຮອງ​ຂອງ​ສຳນັກງານ​ໄອ​ຍະ​ການສູງ​ສຸດ ​ທີ່​ ກຸງ​ເທບ​ມະຫາ​ນະຄອນ. ຝ່າຍ​ລາວ​ນຳ​ໂດຍ​ ທ່ານ ​ໄຊະນະ​ ໂຄດພູທອນ ຮອງ​ຫົວໜ້າ​ອົງການ​ໄອ​ຍະ​ການ​ປະຊາຊົນ​ສູງ​ສຸດ ​ແຫ່ງ ສປປ ລາວ ​ແລະ ຝ່າຍ​ໄທ​ນຳ​ໂດຍ​ທ່ານ ຕະກຸນ ວິນິດ​ໄນ​ພາກ ​ໄອ​ຍະ​ການ​ສູງ​ສຸດ ​ແຫ່ງ ຣາຊະ​ອານາຈັກ​ໄທ. ​ໂດຍ​ການ​ເຂົ້າ​ຮ່ວມ​ຂອງ ພະ​ເຈົ້າ​ຫຼານ​ເທີ ພັດຊະລະ​ ກິ​ຕິ​ຍາ​ພາ ພ້ອມ​ດ້ວຍ​ພະນັກງານ​ຂັ້ນ​ສູງ​ຂອງ​ສອງ​ຝ່າຍ. ກອງ​ປະຊຸມ​ຝ່າຍ​ລາວ​ໄດ້​ນຳ​ສະ​ເໜີ ​ແລະ ​ເຫັນ​ດີ​ສືບ​ຕໍ່​ເນື້ອ​ໃນ​ບົດ​ບັນທຶກ​ຄວາມ​ເຂົ້າ​ໃຈ​ທີ່​ໄດ້​ລົງ​ນາມ​ຮ່ວມ​ກັນ ຄັ້ງ​ວັນ​ທີ 25 ມີນາ 2004 ທີ່​ຜ່ານ​ມາ. ຊຶ່ງ​ເຫັນ​ວ່າ​​ບົດ​ບັນທຶກ​ໄດ້​ບັນຍັດ​ເປັນ​ຫລັກການ​ລວມ ​ແລະ ມີ​ຄວາມ​ສອດ​ຄ່ອງ​ກັບ​ສະພາບ​ຄວາມ​ເປັນ​ຈິງຂອງ​ສອງ​ປະ​ເທດ​, ບັນຫາ​ສຳຄັນ​ແມ່ນການ​ເອື້ອ​ອຳນວຍ​ຄວາມ​ສະດວກ ​ແລະ ຊຸກຍູ້​ໃຫ້ບັນດາ​ອົງການ​ໄອ​ຍະ​ການ​ທ້ອງ​ຖິ່ນ ທີ່​ມີຊາຍ​ຕິດ​ຈອດ​ກັນ​​ໄດ້ມີການ​ພົບ​ປະ ​ແລະ ປະສານ​ງານ​ຮ່ວມ​ກັນ​ເພື່ອ​ປຶກສາ​ຫາລື​ ແລກປ່ຽນ​ບົດຮຽນດ້ານ​ວຽກ​ງານ​ໄອ​ຍະ​ການ ກໍ​ຄື​ການ​ຮ່ວມ​ມື​ໃນ ​ການ​ຕ້ານ​ອາ​ຊະ​ຍາ​ກຳ​ຂ້າມ​ຊາດ ເພື່ອ​ຈັດ​ຕັ້ງ​ໃຫ້​ເປັນ​ຮູບ​ປະ​ທຳ​ຫລາຍ​ຂຶ້ນ, ຊຶ່ງ​ເປັນ​ການ​ປະກອບສ່ວນສຳຄັນ​ເຂົ້າ​ໃນ​ການ​ເສີມ​ສ້າງສາ​ຍພົວພັນ ​ແລະ ການ​ຮ່ວມ​ມື​ວຽກ​ງານ​ໄອ​ຍະ​ການ ຂອງ ​ສອງ​ປະ​ເທດ​ດີ​ຂຶ້ນ​ເທື່ອ​ລະ​ກ້າວ.

ກອງ​ປະຊຸມ​ທັງສອງ​ຝ່າຍ​ຍັງ​ເຫັນ​ດີ​ເປັນ​ເອກະ​ພາບ​​ໃນ​ການ​ແລກປ່ຽນ​ຄະນະ​ຜູ້​​ແທນໃນ​ລະດັບ​ສູງ, ຂັ້ນ​ວິຊາ​ການ, ຈັດ​ຊຸດ​ສຳ​ມະ​ນາ​ຮ່ວມກ່ຽວ​ກັບການ​ສະກັດ​ກັ້ນ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກນ້ອຍ, ການປົກ​ປ້ອງ​ຊ່ວຍ​ເຫຼືອ​ເດັກ​ທີ່​ເປັນ​ຜູ້​ເຄາະ​ຮ້າຍ, ​ເດັກ​ເປັນ​ພະຍານ, ການ​ດຳ​ເນີນ​ຄະດີ​ຕໍ​ເດັກ​ທີ່​ໄດ້​ກະທຳ​ຜິດ ​ແລະ ການ​ຮ່ວມ​ມື​ທາງ​ດ້ານ​ຍຸຕິ​ທຳ​ທາງ​ອາຍາ ​ແລະ ວຽກ​ງານ​ອື່ນໆ ທີ່​ສອງ​ຝ່າຍ​ເຫັນ​ວ່າ​ມີ​ຄວາມ​ສົນ​ໃຈນຳ​ກັນ.

2015-03-27

ປະຕິທິນ

Apr-2018
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ