ກອງປະຊຸມວຽກງານໄອຍະການປະຊາຊົນທົ່ວປະເທດ ໄຂຂຶ້ນຢ່າງເປັນທາງການ

ໃນວັນທີ 24 ກຸມພາ 2016 ທີ່ ອົງການໄອຍະການປະຊາຊົນສູງສຸດນະຄອນຫລວງວຽງຈັນ ໄດ້ໄຂກອງປະຊຸມວຽກງານໄອຍະການປະຊາຊົນທົ່ວປະເທດປະຈຳສົກປີ 2014-2015 ພາຍໃຕ້ການເປັນປະທານຂອງ ທ່ານ ຄໍາສານ ສຸວົງ ກໍາມະການສູນກາງພັກ, ຫົວໜ້າອົງການໄອຍະການປະຊາຊົນສູງສຸດ ໂດຍການເຂົ້າຮ່ວມຂອງ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແລະ ມີພະນັກງານການນຳແຕ່ລະຂັ້ນອ້ອມຂ້າງສູນກາງ ແລະ ທ້ອງຖິ່ນໃນຂອບເຂດທົ່ວປະເທດເຂົ້າຮ່ວມທັງໜົດ 100 ກ່ວາທ່ານ.

ກອງປະຊຸມວຽກງານໄອຍະການປະຊາຊົນຄັ້ງນີ້ ແມ່ນປີມວນທ້າຍ ຂອງ ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ III ຂອງອົງຄະນະພັກ ອົງການໄອຍະການປະຊາຊົນສູງສຸດ ແລະ ວາງທິດທາງແຜນການ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫ່ຍ ຂອງພັກ. ໃນໄລຍະໜຶ່ງປີຜ່ານມາດ້ວຍຄວາມບຸກບືນຜ່ານຜ່າ ແລະ ຄວາມເອົາໃຈໃສ່ສູ້ຊົນ ຂອງ ອົງການໄອຍະການປະຊາຊົນຂັ້ນຕ່າງໆ ນັບແຕ່ສູນກາງລົງຮອດທ້ອງຖິ່ນ, ສາມາດຍາດໄດ້ຜົນງານຫລາຍປະການທີ່ສຳຄັນ ເປັນຕົ້ນ: ລະບົບການຈັດຕັ້ງທຸກຂັ້ນໄດ້ຮັບການປັບ ປຸງຢ່າງເປັນລະບົບໜັກແໜ້ນ, ຖັນແຖວພະນັກງານແຕ່ລະປີໄດ້ຮັບການບຳລຸງກໍ່ສ້າງທາງດ້ານຈຳນວນ ແລະ ຄຸນນະພາບເພີ່ມຂຶ້ນ. ການປະຕິບັດພາລະບົດບາດ, ຕິດຕາມກວດກາການເຄົາລົບ ແລະ ປະຕິບັດກົດໝາຍ ແລະ ການສັ່ງຟ້ອງຄະດີຂຶ້ນສານສາມາດຮັບປະ ກັນໄດ້ຄວາມຖືກຕ້ອງຄົບຖ້ວນ, ຮອບດ້ານ, ພາວະວິໄສ. ພື້ນຖານວັດຖຸເຕັກນິກໄດ້ຮັບການຕອບສະໜອງມີການພັດທະນາດີຂຶ້ນ. ທັງໝົດນີ້ໄດ້ເປັນການປະກອບສ່ວນເຂົ້າໃນການພັດທະນະ ແລະ ປັກຮັກສາປະເທດຊາດ, ເຮັດໃຫ້ຄວາມສັກສິດ ຂອງ ການຄຸ້ມຄອງລັດ -ຄຸ້ມຄອງສັງຄົມດ້ວຍກົດໝາຍໄດ້ຮັບການຍົກສູງ, ປະກົດການຫຍໍ້ທໍ້ໃນສັງຄົມ ກໍຄືການລະເມີດລະບຽບກົດໝາຍ ໄດ້ຮັບການແກ້ໄຂດ້ວຍທິດທາງ ແລະ ມາດຕະການຕ່າງໆ ຢ່າງເປັນເຈົ້າການ. ກອງປະຊຸມໄດ້ຮັບຟັງ ແລະ ປະກອບຄໍາຄິດ ຄໍາເຫັນ ຂອງ ບັນດາຄະນະຜູ້ແທນກອງປະຊຸມຕໍ່ຮ່າງບົດສະຫຼຸບຕີລາຄາການເຄື່ອນໄຫວວຽກງານຮອບດ້ານປະຈຳສົກປີ 2014-2015 ຜ່ານມາ ແລະ ຄົ້ນຄວ້າທິດ ທາງໜ້າ ທີ່ ຈຸດສຸມສຳລັບສົກປີ 2015-2016 ແລະ ແຜນພັດທະນາວຽກງານໄອຍະການ 5 ປີຜ່ານມາ (2011-2015) ກໍານົດວິໄສທັດຮອດປີ 2030, ແຜນຍຸດທະສາດໄລຍະ 10 ປີ (2016- 2025) ແລະ ແຜນພັດທະນາວຽກງານໄອຍະການ 5 ປີ (2016 -2020) ສະຫຼຸບຂໍ້ແຂ່ງຂັນ 3 ມີ 4 ຮັບປະກັນ ຂອງ ອົງການໄອຍະການປະຊາຊົນສູງສຸດ ແລະ ມອບທຸງໄຊດີເດັ່ນໃຫ້ກົມກອງ-ລວມໜູ່, ມອບໃບຍ້ອງຍໍ, ໃບຊົມເຊີຍໃຫ້ແກ່ບຸກຄົນທີ່ມີຜົນງານດີເດັ່ນ. ກອງປະຊຸມຍັງໄດ້ຮັບຟັງການໂອ້ລົມຂອງ ທ່ານ ປະທານສະພາແຫ່ງຊາດ ບາງຕອນທ່ານກ່າວວ່າ: ກ່ອນອື່ນຕ້ອງເພີ່ມທະວີຊີ້ນຳ- ນຳພາ ແລະ ສຶກສາອົບຮົມການເມືອງ-ແນວຄິດ ຂອງ ການນຳ ອົງການໄອຍະການປະຊາຊົນທຸກຂັ້ນ ໃຫ້ແກ່ຖັນແຖວພະນັກງານດ້ວຍຄວາມໜັກແໜ້ນທາງດ້ານຄຸນທາດການເມືອງ ແລະ ມີຄວາມສາມາດທາງດ້ານວິຊາສະເພາະເຂົ້າໃນວຽກງານຕົວຈິງຂອງຂະແໜງການໃຫ້ເກີດຜົນ ເປັນຕົ້ນ ທັດສະນະທາດແທ້ ຂອງ ລັດພວກເຮົາແມ່ນລັດຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ. ສະນັ້ນໃນອຸດົມການເຄື່ອນໄຫວ ຂອງ ພະນັກງານໄອຍະການປະຊາຊົນ ແຕ່ລະຂັ້ນແມ່ນຕ້ອງຖືເອົາການປົກປ້ອງສິດ ແລະ ຜົນປະໂຫຍດ ຂອງ ລັດ, ປົກປ້ອງສິດ ແລະ ຜົນປະໂຫຍດອັນຊອບທຳ ຂອງ ຜົນລະເມືອງເປັນກົກ, ຊອກຫາຫລັກຖານຄວາມຈິງໃນການດຳເນີນຄະດີ, ການເບີ່ງຫລັກຖານ ຂອງ ຄະດີກໍຕ້ອງມີທັດສະນະຢ່າງຖືກຕ້ອງ. ສະນັ້ນ, ອົງການໄອຍະການປະຊາຊົນຕ້ອງເປັນທີ່ເພີ່ງຂອງປະຊາຊົນ ກວດກາໃຫ້ເຫັນຄວາມເປັນຈິງເພື່ອຮັບປະກັນປົກປ້ອງກົດໝາຍໃຫ້ເຂັ້ມງວດ ແລະ ມີຄວາມຍຸຕິທຳ. ກອງປະຊຸມຈະດຳເນີນໄປເປັນເວລາ 3 ວັນ ຈຶ່ງຈະອັດລົງ.

2016-02-24

ປະຕິທິນ

Apr-2018
S M T W T F S
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30

ລິຂະສິດ © 2017
ອົງການໄອຍະການປະຊາຊົນສຸງສຸດສະຫງວນລິຂະສິດໄວ້ທັງໜົດ