ໃນຕອນເຊົ້າວັນທີ 2 ສີງຫາ 2016 ທີ່ ອົງການໄອຍະການປະຊາຊົນສູງສຸດໄດ້ຈັດພິທີຮັບຟັງປາຖະກະຖາຫວນຄືນມູນເຊື້ອ 02 ວັນປະຫວັດສາດຂອງຊາດ ຄື: ວັນຄ້າຍວັນ​ເກີດ​ຂອງ ປະທານ ສຸພາ​ນຸວົງ ອາດີດປະທານປະເທດຜູ້ທຳອິດຂອງ ສ.ປ.ປ ລາວ ຄົບຮອບ 107 ປີ (13 ກໍລະກົດ 1909  ຫາ 13 ກໍລະກົດ2016) ແລະ ວັນລະນຶກ ລັດຖະທຳມະນູນ ແຫ່ງ ສປປ ລາວ ຄົບຮອບ 25 ປີ (15 ສີງຫາ 1991 ຫາ 15 ສີງຫາ 2016) ຂື້ນໃຫ້ກຽດເຜີຍແຜ່ເອກະສານໃນຄັ້ງນີ້ ທ່ານ ຄໍາສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ເຂົ້າຮ່ວມຟັງປະຖະກະຖາຄັ້ງນີ້ມີ ຄະນະພັກ, ຄະນະນຳອົງການໄອຍະການປະຊາຊົນສູງສຸດ, ບັນດາຫົວໜ້າກົມ, ຮອງຫົວໜ້າກົມ-ຫ້ອງການ, ອົງ ການໄອຍະການພາກກາງ ແລະ ສະຖາບັນຄົ້ນຄ້ວາ ແລະ ຝຶກອົບຮົມໄອຍະການ ພ້ອມດ້ວຍພະນັກງານເຂົ້າຮ່ວມທັງໝົດ 100 ກ່ວາຄົນ.

        ທ່ານຫົວໜ້າອົງການໄອຍະການປະຊາຊົນສູງສຸດ ໄດ້ເລົ່າຫວນຄືນມູນເຊື້ອປະຫວັດຄວາມເປັນມາ ແລະ ໄດ້​ຍົກ​ໃຫ້​ເຫັນວ່າ ປະ ທານ ສຸພາ​ນຸວົງ ແມ່ນ​ນັກ​ຮົບ​ຮັກ​ຊາດ​ຮຸ່ນ​ທຳ​ອິດ ​​ທີ່ໄດ້​​ເອົາຊີວິດ​ຕິດ​ພັນກັບ​ການປະຕິວັດ​ຕະຫຼອດ​ມາ ບໍ່​ວ່າ​ໃນ​ຖານະ​ຕຳ​ແໜ່​ງ​ໃດ ​ເພິ່ນ​ກໍ່​ອຸທິດ​ໜົດຈິດ​ໜົດ​ໃຈ​ໜົດຄວາມ​ສາມາດ ​ແລະ ຫົວຄິດ​ປະດິດ​ສ້າງ ​ເພື່ອ​ພາລະກິດ​ປະຕິວັດ, ​ເພື່ອ​ຊາດ ​ແລະ ​ເພື່ອ​ປະຊາຊົນ​ຢ່າງ​ບໍລິສຸດ ເວົ້າລວມ, ເວົ້າສະເພາະ​ແບບຢ່າງ ​ແລະ ຄຸນງາມຄວາມດີ​ຂອງ ປະທານ ສຸພາ​ນຸວົງ ​ໄດ້​ກາຍ​ເປັນ​ແວ່ນ​ແຍງ​ທີ່​ໃສ​ສະອາດ ​ແລະ ​ເປັນ​ບົດຮຽນ​ອັນ​ລ້ຳ​ຄ່າ​ໄວ້​ໃຫ້​ແກ່​ຄົນ​ລາວ​ຮຸ່ນ​ສືບ​ທອດ​ໄດ້​ຈົດ​ຈຳ ​ແລະ ຮໍ່າ​ຮຽນ​ເອົາ​ຢ່າງ​ບໍ່​ມີ​ວັນ​ລືມ.

           ຈາກນັ້ນ ທ່ານຫົວໜ້າອົງການໄອຍະການປະຊາຊົນສູງສຸດ ຍັງໄດ້ຍົກໃຫ້ເຫັນເຖິງຄວາມໝາຍ, ຄວາມສຳຄັນ ຂອງ ວັນລັດຖະ ທຳມະນູນ ແຫ່ງ ສປປ ລາວ ຄົບຮອບ 25 ປີ (15 ສີງຫາ 1991 ຫາ 15 ສີງຫາ 2016).   ​ເຊິ່ງລັດຖະທຳມະນູນ ແຫ່ງ ສປປ ລາວ ໄດ້ຖືກຮັບຮອງໃນກອງປະຊຸມ ຄັ້ງທີ VI ຂອງ ສະພາປະຊາຊົນສູງສຸດ ໃນຊຸດທີ II ປີ 1991 ແລະ ໄດ້ປະກາດໃຊ້ ໃນວັນທີ 15 ສິງຫາ 1991 ມາຮອດປີ 2003. ກອງປະຊຸມສະພາຊຸດທີ V ໄດ້ຮັບຮອງເອົາການປັບປຸງລັດຖະທຳມະນູນສະບັບດັ່ງກ່າວໃຫ້ຄົບຖ້ວນ ແລະ ສົມບູນກວ່າເກົ່າ, ການປະກາດໃຊ້ລັດຖະທຳມະນູນແມ່ນມີຄວາມໝາຍຄວາມສຳຄັນຫລາຍຕໍ່ປະເທດຊາດ ເພາະວ່າ ລັດຖະທຳມະນູນແມ່ນກົດ ໝາຍພື້ນຖານສຳຄັນຂອງຊາດໃນການຫັນແນວທາງປ່ຽນແປງໃໝ່ຢ່າງຮອບດ້ານ ທີ່ມີຫລັກການຂອງ ພັກປະຊາຊົນປະຕິວັດລາວ ການປະກາດໃຊ້ລັດຖະທຳມະນູນເປັນເຫດການ ການເມືອງ ທີ່ສຳຄັນຂອງຊາດ ທັງເປັນຂີດໝາຍໃໝ່ໃນການຫັນໄປສູ່ການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ ແລະ ສ້າງໃຫ້ເປັນລັດແຫ່ງກົດໝາຍເທື່ອລະກ້າວ. ມັນໄດ້ສອງແສງໃຫ້ເຫັນເຖິງລັກສະນະທາດແທ້ ແລະ ການເຕີບໃຫຍ່ຂະຫຍາຍຕົວຂອງ ລະບອບປະຊາທິປະໄຕປະຊາຊົນລາວ ພາຍໃຕ້ການນຳພາອັນຖືກຕ້ອງຂອງ ພັກປະຊາຊົນປະຕິວັດລາວທັງເປັນການຢືນຢັນຕໍ່ໂລກກ່ຽວກັບຄວາມເປັນເອກະລາດ ແລະ ຜືນແຜ່ນດິນອັນຄົບຖ້ວນຂອງຊາດລາວ.

2016-08-02